मतदान जरुर करव
हमर भारत देश ह संसार के सबले बड़े लोकतंत्र देश हरे । इंहा चुनाव के माध्यम से मुखिया चुने जाथे । जेन पार्टी ला सबले जादा वोट मिलथे उही पार्टी के आदमी मुख्यमंत्री अउ प्रधानमंत्री बनथे ।
मताधिकार- ---- हमर देश में मताधिकार या वोट डारे के काम 18 साल या 18 ले जादा के महिला पुरुष मन कर सकथे ।
मतदाता जागरुकता कार्यक्रम ------- चुनाव आयोग द्वारा चुनाव के समय में मतदाता जागरुकता कार्यक्रम चलाय जाथे । ताकि हर आदमी अपन वोट के सही उपयोग कर सके । ये कार्यक्रम चलाय जाना भी बहुत जरुरी हे । एक एक वोट के बहुत महत्व होथे । एक वोट से आदमी के हार अउ जीत होथे । एकर सेती हर आदमी ला वोट देना बहुत जरुरी हे ।
चुनाव आयोग के द्वारा हर साल 25 जनवरी के दिन राष्ट्रीय मतदाता दिवस के रुप में मनाये जाथे ।
एकर इही उद्देश्य हे कि गाँव - गाँव के हर नागरिक अपन कर्तव्य के प्रति जागरूक मतदाता बने अउ सही आदमी के चुनाव कर सके ।
मतदाता जागरुकता काबर जरुरी हे -------- मतदाता जब जागरूक होही तभे वोहर सही आदमी के चुनाव कर सकथे ।
अक्सर गाँव में देखे जाथे के बहुत कम वोट डारे जाथे । वोला चुनाव से कोनों मतलब नइ रहय । एकर मायने ये होथे कि उँहा के आदमी जागरूक नइहे । कम वोट परे से सही आदमी के चुनाव नइ हो पाय अउ गलत जनप्रतिनिधि जीत के आ जथे जेहर ढंग से विकास कार्य नइ करे । येकर सेती सबला जागरूक होना बहुत जरूरी हे ।
भारत निर्वाचन आयोग के द्वारा जगा जगा बैनर , पोस्टर, रैली , मीडिया इंटरनेट आदि के द्वारा प्रचार प्रसार करे जाथे । ताकि हर नागरिक अपन वोट के सही उपयोग कर सके ।
आजकल हर गाँव के स्कूल , कालेज में भी ये कार्यक्रम चलाय जाथे । जग जगा रैली अउ जुलुस निकाले जाथे । कई जगा नुक्कड़ नाटक के माध्यम ले भी आदमी ला जागरूक करे जाथे । येकरे सेती अब दिनोंदिन मतदान के प्रतिशत बाढ़त जात हे ।
अपन वोट के सही उपयोग करना चाहिए ---- आजकाल कुछ प्रत्याशी मन ह चुनाव जीते बर आदमी मन ल बहुत लालच देथे । जइसे - रुपिया पइसा देना , दारु मुरगा बाँटना , लुगरा कंबल बाँटना आदि । ये प्रकार के लालच में नइ फँसना चाहिए । येकर से सही प्रतिनिधि के चुनाव नइ हो सके अउ लोकतंत्र कमजोर पर जथे ।
अपन वोट ला सोच समझ के सही आदमी ल देना चाहिए जेहा विकास के काम करवा सकथे । काकरो लालच में नइ आना चाहिए । इही जागरुक मतदाता के पहिचान हरे ।
मतदाता जागरुकता बर कुछ नारा --
(1) सब काम ला छोड़ दो ।
सबले पहिली वोट दो ।
(2) वोट डारे बर जाना हे ।
अपन फर्ज निभाना हे ।
(3) लोकतंत्र के का पहिचान ।
सबले पहिली करव मतदान ।
(4) युवा शक्ति ला जगाना हे ।
सबला मतदान कराना हे ।
(5) घर घर अलख जगाना हे ।
मतदाता जागरूक बनाना हे ।
लेखक
महेन्द्र देवांगन माटी
पंडरिया छत्तीसगढ़
Mahendra Dewangan Mati
Comments
Post a Comment