उल्लाला छन्द - 3

सुन राम नाम से होत हे , भव सागर हा पार जी ।
तँय सेवा करले दीन  के, जिनगी के दिन चार जी  ।।

सुन जिनगी जब तक तोर हे ,  दया धरम अउ दान कर ।
तँय का ले जाबे साथ मा ,  सबके इँहचे मान कर ।।

जब रइही तन मा साँस हा, तब करबे तैं काम जी ।
सुन छुट जाही जब जीव हा , जाबे ऊपर धाम जी ।।

सुन किरपा होथे गुरु मिलय , देवय सबला ज्ञान जी ।
सब अंधकार मिट जात हे , लगय पढ़े मा ध्यान जी ।।

झन बेटी बेटा भेद कर , दूनों एक समान जी ।
ये घर के मर्यादा रखय , कुल के दीपक जान जी ।।

सुन जब जब होथे देश मा , अब्बड़ अत्याचार जी ।
तब बेटी आथे रूप मा  , दुर्गा के अवतार जी ।।

सुन सेवा करले गाय के,  आथे अब्बड़ काम जी ।
सब देवी देवता वास हे , येहा तीरथ धाम जी ।।

सुन दूध दही ला खाय से, ताकत अब्बड़ आय जी ।
अब पालव सबझन गाय ला , कामधेनु ये ताय जी  ।।

नियम --
(1)  2 पद 4 चरण
(2) सम - सम चरण मा तुकान्तता ।
(3) 15 - 13 मात्रा में यति
        यानी विषम चरण में 15 मात्रा अउ
          सम चरण में 13 मात्रा ।
(4) विषम चरण के शुरु में "द्वि कल" याने
       दो मात्रा वाले शब्द आना चाहिए ।
(5) येला "उल्लाल" छन्द भी बोले जाथे ।

महेन्द्र देवांगन माटी
पंडरिया  (कवर्धा )
छत्तीसगढ़
8602407353
@ Mahendra Dewangan Mati