मोर छत्तीसगढ़ महतारी

*मोर छत्तीसगढ़* (गीत)
मोर छत्तीसगढ़ महतारी हा , सरग बरोबर लागे ।
गुरतुर गुरतुर भाखा बोली , सबके मन ला भा गे ।।
मोर छत्तीसगढ़ महतारी हा .......... ................
              भेदभाव नइ जानय इँहा  ,
                सबके सेवा करथे ।
               मिल बाँट के खाथे सुघ्घर ,
                दुख पीरा ला हरथे ।
धरती दाई के सेवा खातिर, बिहना ले सब जागे ।
मोर छत्तीसगढ़ महतारी हा , सरग बरोबर लागे ।।
               आनी बानी तीज तिहार ला ,
                 मिलके सबो मनाथे ।
                ठेठरी खुरमी चीला सोंहारी ,
                   घर घर सबो बनाथे ।
गुलगुल भजिया अबड़ मिठाथे , थरकुलिया मा माँगे ।
मोर छत्तीसगढ़ महतारी हा , सरग बरोबर लागे ।।
                 सीधा सादा मनखे इँहा ,
                  गारी गल्ला नइ जानय ।
                   घर मा आथे कोनों सगा ,
                     देवता सही मानय ।
देख इँहा के रीत रिवाज ला , दुनिया भर मा छा गे ।
मोर छत्तीसगढ़ महतारी हा , सरग बरोबर लागे ।।
*महेन्द्र देवांगन* *"माटी"*
     *राजिम
      *छत्तीसगढ़*