नरवा गरवा घुरुवा बारी
छत्तीसगढ़ ह आघू बढही , इही हमर चिन्हारी ।।
नरवा ल सब बाँध के राखव , काम सबो के आही ।
जीव जंतु अउ बारी बखरी , सबके प्यास बुझाही ।।
खेती करबो मिल के संगी , पानी पलही बारी ।
छत्तीसगढ़ ह आघू बढही , इही हमर चिन्हारी ।।
नरवा गरवा ..............................
जतन करव सब गरवा मन के , अब्बड़ नफ्फा हाबे ।
मिलही गोबर छेना सब ला , दूध दही ला पाबे ।।
लक्ष्मी मानव येला संगी , बाँधव घरे दुवारी ।
छत्तीसगढ़ ह आघू बढही , इही हमर चिन्हारी ।।
नरवा गरवा .................................
गोबर कचरा पैरा माटी, घुरवा मा सब डारव ।
साफ सफाई राखव घर मा , कचरा ला सब टारव ।।
गोबर खातु खेत मा डारव , होय फसल गा भारी ।
छत्तीसगढ़ ह आघू बढ़ही , इही हमर चिन्हारी ।।
नरवा गरवा ......................................
बारी बखरी बोंवव सबझन , भाजी पाला खावव ।
बेंचव टोर बजार म संगी , अब्बड़ पइसा पावव ।।
बढ़ही सबके आमदनी हा , योजना हे सरकारी ।
छत्तीसगढ़ ह आघू बढ़ही , इही हमर चिन्हारी ।।
नरुवा गरुवा ....................................
महेन्द्र देवांगन माटी
पंडरिया ( कवर्धा)
छत्तीसगढ़
8602407353
Mahendra Dewangan Mati
Comments
Post a Comment