आमा के चटनी
आमा के चटनी
****************
आमा के चटनी ह अब्बड़ मिठाथे,
दू कंऊरा भात ह जादा खवाथे ।
कांचा कांचा आमा ल लोढहा म कुचरथे,
लसुन धनिया डार के मिरचा ल बुरकथे।
चटनी ल देख के लार ह चुचवाथे,
आमा के चटनी ह अब्बड़ मिठाथे ।
बोरे बासी संग में चाट चाट के खाथे,
बासी ल खा के हिरदय ह जुड़ाथे ,
खाथे जे बासी चटनी अब्बड़ मजा पाथे
आमा के चटनी ह अब्बड़ मिठाथे ।
बगीचा में फरे हे लट लट ले आमा ,
टूरा मन देखत हे धरों कामा कामा ।
छिप छिप के चोराय बर बगीचा में जाथे
आमा के चटनी ह अब्बड़ मिठाथे ।
दाई ह हमर संगी चटनी सुघ्घर बनाथे,
ओकर हाथ के बनाय ह गजब मिठाथे ।
कुर संग म भात ह उत्ता धुर्रा खवाथे
आमा के चटनी ह अब्बड़ मिठाथे ।
******************
रचना
महेन्द्र देवांगन "माटी"
गोपीबंद पारा पंडरिया
जिला -- कबीरधाम (छ ग )
पिन - 491559
मो नं -- 8602407353
Comments
Post a Comment