बसंती हवा
बसंती हवा
*************
लाल लाल फूले हे , परसा के फूल ।
बांधे हे पेड़ मा , झूलना ला झूल ।
पिंयर पिंयर दिखत हे, सरसों के खेत ।
गाय गरु चरत हे , करले थोकिन चेत ।
टप टप टपकत हावय , मऊहा के फर ।
बीन बीन के टूरी तैं , झंऊहा मा धर ।
आये हे बसंत रितु, चलत हे बयार ।
मेला घूमे ला जाबोन, रहिबे तइयार ।
आवत हे होली अऊ , गाबोन जी फाग ।
मय गाहूं गाना अऊ , तैं झोंकबे राग ।
मटक मटक रेंगत हे , मोटियारी टूरी ।
खन खन बजावत हे , हाथ के चूरी ।
फुरुर फुरुर चलत हे , बसंती हवा ।
मटकावत हे आंखी, पहिरे कपड़ा नवा ।
आमा बगीचा मा, कोयली ह मारत कूक ।
आज मोरो मन ह , करत हे धूक धूक ।
महेन्द्र देवांगन माटी
(बोरसी - राजिम वाले )
पंडरिया (कवर्धा )
8602407353
Mahendra Dewangan Mati
Comments
Post a Comment