Tuesday, 28 August 2018

नशा पान

छन्न पकैया छन्न पकैया  , नशा पान ला छोड़ो ।
होथे जी बीमारी अब्बड़  , एकर से मुँह मोड़ो ।।1।।

छन्न पकैया छन्न पकैया  , गुटखा जेहा खाथे ।
केंसर होथे वोला संगी ,  अब्बड़ दुख ला पाथे ।।2।।

छन्न पकैया छन्न पकैया  , नशा पान जे करथे ।
किसम किसम बीमारी होथे  , जल्दी वोहा मरथे ।।3।।

छन्न पकैया छन्न पकैया  , हावय जेहा आदी ।
पइसा कौड़ी कुछु नइ बाँचे  , हो जाथे बरबादी ।।4।।

छन्न पकैया छन्न पकैया  , पी के  जेहा सुतथे ।
घोंडे रहिथे सूरा जइसे  , कुकुर मुँहू मा मुतथे ।।5।।

छन्न पकैया छन्न पकैया  , जेहा पीथे खाथे ।
देंह खोखला हो जाथे अउ , माटी मा मिल जाथे ।।6।।
*******************
मात्रा ---- 16 + 12 = 28
ये हर सार छन्द के एक किसम हरे । येमा "छन्न पकैया छन्न पकैया" एक टेक बरोबर शुरु मा आथे ।
बाकी सब नियम सार छन्द के लागू होथे ।

महेन्द्र देवांगन माटी
पंडरिया  (कबीरधाम )
छत्तीसगढ़
8602407353
@Mahendra Dewangan Mati

No comments:

Post a Comment