नंदावत पोरा तिहार
पोरा पटकई ह घलो नंदावत हे ,
कोनों ह अब पटके ल नइ जावत हे ।
घर में खुसरे खुसरे पोरा मनावत हे ,
ठेठरी खुरमी ल मुसुर मुसुर खावत हे ।
माटी के बइला में चीला चढावत हे ,
ठेठरी खुरमी ल सींग में ओरमावत हे।
लइका मन तको बइला नइ चलावत हे ,
मोबाइल में गेम खेलके दिन ल पहावत हे ।
चुकी पोरा ल नोनी मन भुलावत हे ,
टी वी के कारटून में मन ल झुलावत हे ।
सखी सहेली मन सुध नइ लेवत हे ,
घर बइठे वाटसप में बधाई ल देवत हे ।
अइसे लागथे धीरे धीरे सब नंदा जाही,
का होथे पोरा ह कहाँ ले जान पाही ।
पोरा तिहार के गाड़ा गाड़ा बधाई
Ⓜमहेन्द्र देवांगन "माटी"Ⓜ
🌹🌹🌹🌹🌹🌹🌹🙏🙏
ye to meri photo hai, mere ghar ke pola ki , ye photo ko karib 10 saal ho gye, aab ye bail duniya me nhi rhe
ReplyDeletetarun badwaik
Delete