मोर गांव कहां गंवागे

-
मोर गांव कहां गंवागे
*******************
मोर गांव कहां गंवागे संगी, कोनो खोज के लावो
भाखा बोली सबो बदलगे, मया कहां में पावों
काहनी किस्सा सबो नंदागे, पीपर पेड़ कटागे
नइ सकलाये कोनों चंउरा में, कोयली घलो उड़ागे
सुन्ना परगे लीम चंउरा ह, रात दिन खेलत जुंवा
दारु मउहा पीके संगी, करत हे हुंवा हुंवा
मोर अंतस के दुख पीरा ल, कोन ल मय बतावों
मोर गांव कहां .......................
जवांरा भोजली महापरसाद के, रिसता ह नंदागे
सुवारथ के संगवारी बनगे, मन में कपट समागे
राम राम बोले बर छोड़ दीस, हाय हलो ह आगे
टाटा बाय बाय हाथ हलावत, लइका स्कूल भागे
मोर मया के भाखा बोली, कोन ल मय सुनावों
मोर गांव कहां..............................
छानी परवा सबो नंदावत, सब घर छत ह बनगे
बड़े बड़े अब महल अटारी, गांव में मोर तनगे
नइहे मतलब एक दूसर से, शहरीपन ह आगे
नइ चिनहे अब गांव के आदमी, दूसर सहीं लागे
लोक लाज अऊ संसक्रिती ल, कइसे में बचावों
मोर गांव कहां........................
धोती कुरता कोनों नइ पहिने, पहिने सूट सफारी
छल कपट बेइमानी बाढ़गे, मारत हे लबारी
पच पच थूंकत गुटका खाके, बाढ़त हे बिमारी
छोटे बड़े कोनों मनखे के, करत नइहे चिन्हारी
का होही भगवान जाने अब, कोन ल मय गोहरावों
मोर गांव कहां...............................
जगा जगा लगे हाबे, चाट अंडा के ठेला
दारु भटठी में लगे हाबे, दरुहा मन के मेला
पीके सबझन माते हाबे, का गुरु अऊ चेला
लड़ई झगरा होवत हाबे, करत हे बरपेला
बिगड़त हाबे गांव के लइका, कइसे में समझावों
मोर गांव कहां गंवागे संगी, कोनों खोज के लावो
रचनाकार
महेन्द्र देवांगन "माटी"
बोरसी - राजिम (छ. ग. )

माटी के रचना

Comments

Post a Comment

Popular posts from this blog

तेरी अदाएँ

-
Image
तेरी अदाएँ काली काली जुल्फों को क्यूँ  , नागिन सी लहराती हो । चंचल नयना शोख अदाएँ , क्यों हरदम इठलाती हो । । लाल गुलाबी होंठ शराबी , देख नशा चढ जाता है । फूलों सी खुशबू को पाकर,  भौरा गाने गाता है ।। कली गुलाब सी कोमल काया , धूप लगे मुरझाती हो । चंचल नयना शोखअदाएँ , क्यों हरदम इठलाती हो ।। पाँवो की पायल से तेरी, धुन  संगीत  निकलता है । सुन आवाजें ताल मारकर , आशिक रोज थिरकता है ।। कोयल जैसी कंठ तुम्हारे  , गीत मधुर तुम गाती हो । चंचल नयना शोखअदाएँ , क्यों हरदम इठलाती हो ।। माथे की बिन्दी यूँ चमके , जैसे चाँद सितारे हों । दाँत तुम्हारे चमके ऐसे  , ज्यों मोती की हारें हों ।। भर भर कंगन पहन हाथ में  ,चूड़ी क्यों खनकाती हो । चंचल नयना शोख अदाएँ  , क्यों हरदम इठलाती हो ।। परियों की रानी लगती हो , सबका मन हर लेती है । नैनों से तुम बाण चलाकर , घायल सब कर देती है ।। घोर घटा छा जाती है जब , जुल्फों को लहराती हो । चंचल नयना शोख अदाएँ  , क्यों हरदम इठलाती हो ।। चंचल चितवन मस्त अदाएँ  ,  क्या जादू कर जाती हो । देख तुझे सब आहें भरते , दिल को क्यों तड़पाती हो ।। चाँद निकल
Read more

अगहन बिरसपति

-
Image
अगहन बिरसपति के पूजा हिन्दू पंचाग मा अगहन महीना के बहुत महत्व हे। कातिक मास के बाद अगहन मास में बिरस्पत (गुरुवार)  के दिन अगहन बिरसपति के पूजा करे जाथे। बिरसपति देव के पूजा करे ले घर मा सुख शांति,  समृद्धि, धन वैभव अउ सबो मनोकामना पूरा हो जाथे। पूजा के तैयारी  ------- अगहन बिरसपति पूजा के तैयारी ल बुधवार के साँझकुन ले ही शुरु कर देथे। सबले पहिली घर दुवार , अँगना , खोर ला बढ़िया लीप बहार के साफ सुथरा करे जाथे। घर के बाहिर दरवाजा मा बढ़िया रंगोली बनाय जाथे।  घर मा लक्ष्मी माता के आसन बनाय जाथे। लक्ष्मी दाई के पाँव बनाय जाथे। घर ल तोरण पताका से सजाय जाथे। लक्ष्मी माता के आसन ------- अगहन बिरसपति के दिन बृहस्पति देव अउ लक्ष्मी माता के चित्र आसन मा रखे जाथे। आसन के तीर मा रखिया, अँवरा (आँवला), अँवरा के डारा, केरा पत्ती, धान के बाली आदि सामान रखे जाथे। ये पूजा मा रखिया अउ अँवरा के बहुत महत्व हे। एकर अलावा गेंदा के फूल,  पीला चाँऊर , चना ,पीला कपड़ा अउ मीठा पकवान रखे जाथे। पूजा के बाद मँझनिया (दोपहर) कुन कथा सुने जाथे तभे पूजा पूरा होथे। पूजा पाठ करे के बाद प्रसाद बाँटे
Read more

वेलेंटटाइन डे के चक्कर

-
Image
वेलेंटटाइन डे के चक्कर में , मँहू एक ठन गुलाब लानेव । हैप्पी वेलेंटटाइन डे कहिके , अपन बाई ल थमायेंव । वोला देखिस बाई ह , वहू ह लजा गे । यहा उमर में तोला , का जवानी छा गे । दे के दिन मे दे नइ हस , अब गुलाब देवत हस । छुछू कस मुंहू लमा के , फोकट के चुमा लेवत हस । नून तेल के चिंता नइहे  , फूल ल धर के लानत हस । मोर अइसने जी बगियाय हे , अउ जरे मा नून डारत हस । मेंहा कहेंव -- चार दिन के जिनगी पगली , आ हाँस के गोठिया ले । का राखे हे जिनगी में,  चल वेलेंटटाइन डे मना ले । वोहा कहिथे -- का होगे तोला , बड़ आशियाना मूड देखावत हस । चुंदी दाँत झरगे तभो ले , अपन थोथना ल लमावत हस । अरे लोग लइका के चिंता कर , ये तो विदेशी संस्कृति आय । हमर मया तो जनम जनम तक हे , हमर बर तो रोज वेलेंटटाइन डे आय । ये झोला ल धर , अउ साग भाजी लान । ये जगा ले सोज बाय , अपन मुंहू ल टार । झोला ल धरा के वोहा , भीतरी में खुसर गे । वेलेंटटाइन डे के भूत ह , मोरो मूड़ ले उतर गे । गयेंव बजार मा अउ गुलाब नहीं  , अब गोभी के फूल ल लायेंव । ये ले मोर रानी कहिके  , ओकर हाथ मे थमायेंव । फूल गोभी ल देख के ,
Read more