माटी के रचना

भाँटा मुरई आज राँधे हे घर में,  भाँटा मुरई । लकर धकर में होगे, अधकुचरा चुरई । दाई हा चुप हे , होगे ददा के चिल्लई । छोटकी हा सुसकत हे , होगे करलई । सटक गे बहू के,  रंग रंग के बोलई । कुरिया में खुसर के,  होगे रोवई । भुलागे लइका ला , पीयाय बर दवई । मीठ मीठ बोल के, "माटी" के मनई । जाना हे जल्दी,  बाबू ला गंवई । पेट नइ भरीस,  आज के खवई । आज रांधे हे घर में,  भाँटा मुरई  महेन्द्र देवांगन माटी पंडरिया छत्तीसगढ़

लइका अब्बड़ पानी खेलथे, सुरुर सुरुर तब नाक करथे । जुड़ खाँसी सरदी हा धरथे, माथ पीरा मा सबझन मरथे । गरम गरम जब देंहें लागथे , रात रात भर दाई जागथे । मूड़ कान अउ पेट पिराथे, तब डाक्टर कर सबझन जाथे । डाक्टर आथे सूजी लगाथे, दवई टानिक के डोज बताथे । सब पीरा हा फुर्र  हो जाथे, खुशी खुशी मा समय बिताथे । Happy Doctor's day . महेन्द्र देवांगन माटी          पंडरिया Dist -- Kabirdham Chhattisgarh