अण्डा के फण्डा

अण्डा के फण्डा ( Egg )

कोनो खावत सेव केरा , कोनो अण्डा खावत हे ।
लइका मन हा मगन होके , रोज स्कूल जावत हे ।।

कोनों ह विरोध करत , कोनों ह खवावत हे ।
असमंजस मे हे सरकार ह , मिटिंग में बलावत हे ।।

कोनों काहत बंद करव , कोनों गुण ल गावत हे ।
लइका मन ह मगन होके , रोज स्कूल जावत हे ।।

गुरुजी मन घेरी बेरी , पालक के घर जावत हे ।
अण्डा चाही के केरा चाही , सहमति ल लिखावत हे ।।

राजनीति के फण्डा मा  , अण्डा ह उबलावत हे ।
लइका मन ह मगन होके , रोज स्कूल जावत हे ।।

पहिली के जमाना ह , अब्बड़ सुरता आवत हे ।
पहिली कापी में मिले अंडा , अब थारी में आवत हे ।।

अब पढ़े ल नइ आय तभो , मुरगा नइ बनावत हे ।
लइका मन ह मगन होके , रोज स्कूल जावत हे ।।

महेन्द्र देवांगन माटी
पंडरिया कबीरधाम
      छत्तीसगढ़
8602407353
Mahendra Dewangan Mati