देवारी तिहार आवत हे
देवारी तिहार आवत हे
*****************
फुरुर फुरुर हावा चलत,जाड़ ह जनावत हे ।
दसेरा ह भुलकगे, देवारी ह अब आवत हे ।
माटी के कोठ ल, दाई ह छबनावत हे।
ओदरे हे चंऊरा ह, बबा ह बनावत हे।
भर भर के गाड़ा में, माटी ल डोहारत हे।
दसेरा ह भुलकगे, देवारी ह अब आवत हे।
फुट गेहे भांड़ी ह, कका ह उठावत हे।
कोरई के राईचर ल, घेरी बेरी बनावत हे।
बखरी बारी ल, रोज के सिरजावत हे।
दसेरा ह भुलकगे, देवारी ह अब आवत हे।
गाँव गली कोलकी ल, रोज के बहारत हे।
दऊंड़ दऊंड़ के बोरिंग ले, पानी डोहारत हे।
गोबर में अंगना ह, रोज के लीपावत हे।
दसेरा ह भुलकगे, देवारी ह अब आवत हे।
नावा नावा कपड़ा ल, नोनी बाबू सिलावत हे।
हांस हांस के अपन , संगवारी ल देखावत हे।
आनी बानी के सबोझन, फटाका लेवावत हे।
दसेरा ह भुलकगे, देवारी ह अब आवत हे।
अपन अपन घर ल,सब कोई लीपावत हे।
कपाट बेड़ी मन में, रंग ल लगावत हे।
माटी के दीया ल , घर घर जलावत हे।
दसेरा ह भुलकगे, देवारी ह अब आवत हे।
***********************
रचना
प्रिया देवांगन "प्रियू"
गोपीबंद पारा पंडरिया
जिला -- कबीरधाम ( छ ग )
Email -- priyadewangan1997@gmail.com
Comments
Post a Comment