Thursday, 23 June 2016

सेल्फी

सेल्फी
*************
जेला देखबे तेला सेल्फी लेवत हे
अऊ फोकट के फोकट इस्माइल देवत हे ।
रंग रंग के पोज में फोटू ल खिंचावत हे
टूरी टूरा मन एक दूसर ल देखावत हे ।
टूरी टूरा ल चिन्हे नइ सकस
हाथ ल धरके घूमत हे
चाट आइसक्रीम गुपचुप खावत
कलब में जाके झूमत हे ।
बिगड़त हे टूरा बबा गारी देवत हे
जेला देखबे तेला सेल्फी लेवत हे।
कूकरी पांख सही चूंदी ल कटावत हे
रोज के रोज करिया करवावत हे ।
आनी बानी के किरीम अऊ सेंठ लगावत हे
नाक ह तो कटा गेहे अब कान ल छेदावत हे ।
साठ साल के बुढवा तको मेछा ल टेंवत हे
जेला देखबे तेला सेल्फी लेवत हे ।
***********
रचना
महेन्द्र देवांगन माटी

No comments:

Post a Comment